Gal 4 | NAS | STEP | Tee eeꞌpinaꞌ minkuamaang, tee naning okiꞌnara barenku okovupeuꞌnung tee tenang okiꞌnaꞌpari botovotonaaꞌ ninka nariꞌ basira, bane teie ookara-koo dau basiari barenku okovuaing pankaꞌparara.

Galatians 4

1 Tee eeꞌpinaꞌ minkuamaang, tee naning okiꞌnara barenku okovupeuꞌnung tee tenang okiꞌnaꞌpari botovotonaaꞌ ninka nariꞌ basira, bane teie ookara-koo dau basiari barenku okovuaing pankaꞌparara. 2 Tenang okiꞌnaꞌpari otoko tee niiꞌninge tanatavai otoko otong tee kavokavoro-nanka bakaning eeꞌnoko tee aung tootoꞌ bera batei baumai miruꞌuuꞌnooꞌ basi. 3 Niiꞌ teeꞌ nariꞌke, tenang Kumponinge oko-antamuriainang batei mmeꞌ tavoꞌkuaruko kapooꞌnanka kantoꞌpuaing kansiꞌaapening-koo biꞌmariri aavuꞌmarikoꞌ~ barenku kong-koo. 4 Teka tenang batei dupevui makotuioꞌ Kumponinge bauring botovuuꞌ; 5 Tee pontoꞌaruꞌ nani-koo manikuma-koo. Moosesi-nung boto-koo kuunge pontoꞌaruꞌ mooꞌuriiꞌnaang teing nantoong Moosesi-nung botoi kuung deempuri otorokoꞌning niiꞌ baurukaaꞌ oko-antaniiꞌnuka oꞌnoriiꞌnaang. 6 Teeꞌkoo diiꞌ okovui baurukaaꞌ deentariko Kumponinge Bauring-koong Tanuaang botovuuꞌ niikaang domang-koo kuunge taaꞌniꞌpoi karantamuriko~ dotumarima aaꞌpampiiꞌnaang, Mmaꞌ ee, Mmaꞌ. 7 Tee tee enang Kumponinge tampaꞌ nkoruioꞌ daꞌ tee enang bautara-ita bakeraring eeꞌnoko tee daꞌ bauring deentaring, eeꞌnoko bauring deekoꞌ tee daꞌ barenku okoruinung.

Paulaꞌke Kalesia-nupoong Napoꞌ Pia-antavuruꞌnaꞌ Tee Taaravaavaꞌnaang

8 Tero tee tenang dake Kumponing noruꞌearukoꞌnang daꞌ tee daiꞌdari otokoꞌ teinge kapooꞌnanka makotuaꞌnanka kumponinanka deeng-anta-koo. 9 Teka enang dake Kumponing noruꞌeing, aiꞌ aaꞌ daꞌ Kumponinge noruꞌdui. Teeꞌkoo enang aming-koo daꞌ napoꞌ tororari teing kapooꞌnanka kantoꞌpuaing ninka daiꞌdari otooꞌnaang, teing ninka toomo sitovuruꞌnanka, aruaruꞌnankai eeꞌnoko aavuꞌarimaing? 10 Diiꞌke tee temuriiꞌkoo aaꞌning siompererimaung doong aꞌmunteꞌmung, kaara averaaꞌteveraaꞌ eeꞌnoko mareꞌ amatemareꞌ Kumponing ninka naroontariainaꞌ besiꞌerima. 11 Diiꞌke ning aririꞌantamering eeꞌ noruꞌamira, “Ning deeꞌma diiꞌ paku-koo tamung poreꞌmouꞌ.”

12 Mmaikoriꞌ ee, ning boto-ita taapoꞌ tontaꞌmaring teeꞌ diiꞌ taapoꞌ otorikoꞌnaꞌ. Teeꞌ nariꞌ bereꞌdarira oꞌnoriaing. 13 Diiꞌke noruꞌeri otong tenang tee siipai siipa-antamuioꞌ datemarara oꞌnoi diiꞌkoo tutung daankimaruꞌ, nka diiꞌke ning orakaꞌ nkomeriaꞌ. 14 Bane siipa-koo orakaꞌ oꞌnoi poreꞌantarampiko maareroriaꞌ ning-koo, baruꞌ orakaꞌ noruꞌmeriaꞌ, teka bakei Kumponing-nung koosinung~pinaꞌ maneenaꞌ nkomeruꞌ, Jiisuuꞌ Karistooꞌ nkoveripeuꞌnaꞌ makosinaꞌ. 15 Arerai tee biraanke ning-koo enang? Aaꞌnung diiꞌke piaamerima dapiꞌ duta bankeꞌdarima amerikoꞌ pakumeriiꞌnaang. 16 Ning enang ee diiꞌke munteꞌmerimang kara masikung naurampiruꞌnung-koo? 17 A, tamung munteꞌmeriaukaꞌnung teinge navuraariko diiꞌ orari-anta-koo. Ning-ankoita siivenkeꞌantaraariko diiꞌke teing daangamperereriiꞌnaang piavoromang. 18 Aꞌnooꞌ nantoonge diiꞌ masikaꞌ paku-koo navuraariko deekoꞌ ookara-koo tampaꞌ eeꞌnoko ning diiꞌ ninka nariꞌ oꞌnoko naroꞌ deeaꞌ. 19 Ee mmaikoriꞌ, ning pareaavaꞌnaang sisikeeravoromanaꞌ sisikeeramomang diiꞌkoo, diiꞌ napoꞌ pontoꞌanta-koo Karistooꞌ napoꞌ diiꞌkoo domang-koo tampaꞌ taaꞌniꞌanta-koo bera taaꞌniꞌpoainooꞌke basi. 20 Piaanaꞌ ning tee diiꞌ ninka nariꞌ oꞌnoriaꞌ. Diiꞌ makosinaꞌ kara-koo piamomaang, nka enang papaaramaring diikaang aarumo-koo isipoꞌ otoriko.

Tee Mirumiruꞌ Eekaaꞌ eeꞌnoko Seeraꞌ aaꞌnaanka-koong

21 Naumeaing dake Moosesi-nung boto-koo kuung otoꞌkoo piaromaunge, tee boto ee taaraveaung dake? 22 Daari Meekunge eeꞌ minkuvumaung: Eebaraamiꞌ baurinketa kenaankara otorekoꞌ, narung teni Seeraꞌ bauring, teni ovorinani, Eebaraamiꞌ baꞌaang. Eeꞌnoko narung teni Eekaaꞌ bauring, teni tamung Seeraꞌ bakaang botovotonaaꞌ, daiꞌnisinani. 23 Teka tee teni daiꞌnisinani bauring tee Eebaraamiꞌ mono-namenge noruꞌari nampuioꞌ tee tootoꞌ bauring paraevuuꞌnung tee barenku nka-koo makosi deeaꞌ, eeꞌnoko tee teni bisiira daiꞌaravaꞌnani bauring tee Eebaraamiꞌ Kumponinge miruꞌuioꞌ nampuuꞌnung-koo maraka-anta siompuioꞌ tee tootoꞌ bauring paraevuuꞌnung tee barenku nka-koo makosi.

24 Aung tee minkunaa paara-anta-poꞌnung. Anaanka manikumaara tee kenaanka kara naroong-anta Kumponing-etaing siong-antavaresi otong. Navung naroong-antanavung tee Moosesi-nung boto sionavung, Sainai-namii-koo nauvuruꞌnavung. Arebia-nupoonge temii Sainai-namii tee Eekaaꞌnamii tampaamaung. Eeꞌnoko teni Eekaaꞌ, Eebaraamiꞌ baꞌaang daiꞌnisinani, teni Jerusalemaꞌnavuntuꞌ miruꞌari otong, Juꞌnupoong biikaang osi pankaing. 25 Eeꞌnoko teing Juꞌnupoonge Moosesi-nung boto siong-koo paaravaama Kumponing ninka naroompariaining-pinaꞌ noruꞌarimainge biukoreeꞌai otoromanamono temono. Eeꞌnoko teing teing temono baurukaaꞌ tee boto-koo daiꞌnisinuka deempariri otorong.

26 Teka niiꞌ niikaang osi pankaing Jerusalemaꞌ paning-koong, eeꞌnoko temono tee Moosesi-nung botoi daiꞌaravaꞌnamono. 27 Daari Meekunge Jerusalemaꞌ paning-koong damaꞌke oroꞌparavaing teronung-koo deto basi tampuuꞌ manikuma-pinaꞌ kara nauvuma aaꞌpuuꞌnaꞌkoo:

“Doturaravaing daꞌ bisiira pareai. Taꞌninaꞌ duuruꞌkiai bane daꞌ tootoꞌ mantompeai. Aiꞌ Kumponinge daꞌ teni daka-pinaꞌ otomai maraka-antaruing teni kuraꞌnariꞌ bioko deentaraaꞌnaang teni baꞌung-poꞌnani puruꞌei.”
(Aisaiaꞌ 54:1)

28 Mmaikoriꞌ ee, niiꞌ enang daiꞌaravaꞌnani bauring pinaꞌ, Aisakeꞌ pinaꞌ oꞌnorining, maraka-antanavunge pontoꞌniiꞌnuka. 29 Eeꞌnoko tee teeꞌ nariꞌ tee tootoꞌ mono siompui pontoꞌaruꞌnunge orakaꞌ nkovukoꞌnaꞌ tee Aisakeꞌ, Tanuaang Meekung bakaang iriꞌke pontoꞌaruꞌnung, teeꞌ nariꞌ enang nkomaarimaung niiꞌ teinge mono-namenge noruꞌariri Kumponing ninka naroong-koo paaravaamainge. 30 Teka teie Daari Meekunge arekeeꞌ minkuvumaung?

“Bataꞌeaing teni daiꞌnisinani eeꞌnoko tee bauring, aiꞌ tee daiꞌnisinani bauring tee barenku okovuaukaꞌnung tee ninka teni daiꞌaravai bauring ninka nariꞌ.”
(Pupuꞌ 21:10)

31 Tee tee enang, ee mmaikoriꞌ, niiꞌ daiꞌnisinani baurukaaꞌ deeaꞌ teka daiꞌaravai baurukaaꞌ niiꞌ.